Në Preshëve protestohet në ditën e Pavarësisë

PRESHEVE- VIDEO* | Nën praninë e muzikës patriotike shqiptare dhe qindra flamujve kuq e zi, shqiptarët e Luginës së Preshevës dhe Bujanovcit kanë protestuar sot për më shumë të drejta.
“Rroftë 28 Nëntori”, “Stop dhuna serbe në Luginën e Preshevës”, “Duam Universitet”, “Duam liri dhe demokraci”, “Jo barrikada, por ura paqeje mes popujve”, ishin disa nga parullat që qytetarët shqiptarë mbanin në duar gjatë protestës.

Në protesta kanë marrë pjesë edhe përfaqësues të subjekteve politike shqiptare të Luginës së Preshevës.

Ne shqiptarët e Luginës së Preshevës pa dëshirën tonë vazhdojmë të jetojmë të ndarë me kufij shtetëror, por asnjëherë nuk e kemi ndalë veprimin tonë në rrugën e realizimit të aspiratave tona kombëtare për bashkim me Kosovën”, ishin fjalët që hapën protestën.

Mospërfillja e kërkesave për realizimin e të drejtave individuale dhe kolektive të shqiptarëve të Luginës së Preshevës, arrestimet në vazhdimësi të shqiptarëve, moslejimi i përdorimit të gjuhës dhe shkrimit shqip dhe simboleve kombëtare, militarizimi i Luginës me forca të uniformuara paraushtarake dhe ushtarake, janë disa nga problemet për të cilat shqiptarët protestuan sot.

“Pavarësisht nga këto probleme të natyrës politike ne kemi mbledh forcë që me dinjitet të protestojmë në vend që të festojmë me rastin e Ditës së Flamurit Kombëtar, me shpresë se në një të ardhme jo të largët edhe këtë problematikë ta rregullojmë me ligj”- thonë ata.

http://www.panorama.com.al/lajmi-i-fundit/ne-presheve-protestohet-ne-diten-e-pavaresise/