Hip-hop koncertet, oferta kryesore për publikun kosovar

Prishtinë, 12 dhjetor - Një ditë pasi u shkundën me performancën e reperit amerikan “The Game”, adhuruesit e këtij zhanri muzikor morën edhe një tjetër lajm. DMX është hip-hop artisti i radhës që do të vizitojë Kosovën në janar. Ai do t’i bashkohet “kastës” së reperëve amerikanë që kanë performuar deri më tani para publikut kosovar. Busta Rhymes, Xzibit, Lloyd Banks e “The Game” janë reperët që shënuan maratonën e koncerteve të sivjetmë hip-hop në kryeqytet. Bashkë me “50 cent” më 2007 dhe “Snoop Dogg” më 2010, hip-hopi kryeson me koncerte në Kosovë.

“Troja” e “Jericho” qenë një kundërpërgjigje e tyre me koncertet që mbajnë gjallë “frymën” rockut. Për ta mposhtur dominimin e hip-hopit nuk mjaftoi as koncerti i grupit alternativ “Manu Chao” në prill të 2011-s .

Përcaktimin për të sjellë në Kosovë reperët më të kërkuar në botë, organizatorët e arsyetojnë me shijen e publikut. Në anën tjetër, njohës të muzikës thonë se duhet të ndërrohet kjo qasje dhe se organizimi i koncerteve të tilla nuk i kontriubon kulturës, por bëhet kryesisht për përfitime materiale./Koha.net/