"Flex Ensemble" nga Gjermania interpreton premierë veprën kosovare

Ansambli nga Gjermania pasditen e së dielës u "stacionua" në njërin nga hotelet e kryeqytetit. "Flex Ensemble" përmbushi misionin e vet, pasi për më shumë se një orë interpretoi notat e thurura nga mjeshtërit botërorë të muzikës. Por violinistja Kana Sugimara, violistja Anna Szule, violonçelistja Martha Bijlsma e pianisti shqiptar Endri Nini nuk ishin mjaftuar me literaturën botërore. Duke qenë mysafirë të Festivalit Ndërkombëtar të Muzikës së Re, ata shpërblyen publikun me interpretimin premierë të veprës "Trio harkore" të kompozitorit kosovar Kreshnik Aliçkaj. Publiku i cili nuk ishte në numër i madh, dëgjoi edhe veprat e kompozitorëve Wofgang Amadeus Mozart, Alfred Schnittke dhe Robert Shumann.

Anna Szule, violiste në "Flex Ensemble" është shprehur e kënaqur që ka pasur rastin të interpretonte një vepër të thurur nga një kompozitor kosovar.

"Vepra është shumë e qëlluar. Madje edhe kur e kuptuam mesazhin e saj shqiptar, na pëlqeu edhe më shumë", ka thënë Szule.

Anëtarja tjetër e ansamblit, Kana Sugimara, ka thënë se "Flex" ka marrë partiturën me notat e Aliçkajt në ditën e parë të majit.

"Realisht kjo partiturë është krejt ndryshe nga ajo që ne jemi mësuar të performojmë. Në momentin e parë që na u dha partitura e kemi sfiduar veten", ka thënë ajo.

Pianisti shqiptar Endri Nini, i cili e shoqëroi ansamblin në interpretimin e veprës së Mozartit, ka thënë se për të është hera e parë që merr pjesë në "Remusica".

"Mendoj se natyra e këtij festivali bën që të ketë bashkëpunime midis kompozitorëve të huaj dhe atyre vendorë prandaj na është caktuar kjo detyrë", ka thënë ai.

Festivali ndërkombëtar i muzikës së re "Remusica" ka nisur rrugëtimin më njëzet të këtij muaji dhe do të përfundojë më tre qershor.

besoj se do ket qene e bukur.....