Zyrtari kosovar është vrarë, arrestohet gruaja dhe 2 vajzat

PRISHTINE - Policia e Kosovës ka arrestuar tre persona, të dyshuar për vrasjen e zyrtarit qeveritar, Hamdi Sopa. Lajmin e ka konfirmuar për KTV-në, zëdhënësi i policisë, Brahim Sadria, i cili bëri të ditur se personat ishin të pranishëm në banesën e të ndjerit në momentin e krimit.

Burime të besueshme konfirmojnë se Policia e Kosovës ka arrestuar gruan dhe të dy vajzat e Hamdi Sopës, si të dyshuara për vrasjen e tij. Gjatë ditës së sotme policia ka bastisur shtëpinë e të dyshuarave, ndërsa ka filluar edhe zhvillimi i hetimeve ndaj të dyshuarave.

Bazuar nga rezultati i autopsisë konstatohet se në rastin konkret kemi të bëjmë me vrasje dhe jo vetëvrasje, prandaj prokurori Blerim Isufaj, i ngarkuar me rastin, sot mori vendim për fillimin e hetimeve dhe ka urdhëruar arrestimin e personave që në momentin kritik kanë qenë prezent në banesën e të ndjerit Sopa, në të cilën dyshohet të jetë kryer vrasja.

Prokurori Isufaj ka kërkuar nga gjykata të lëshojë urdhëresë për bastisjen e banesës së të ndjerit dhe njëkohësisht ka propozuar caktimin e paraburgimit për të dyshuarit.

Hamdi Sopa, zyrtar për informim në Zyrën e Kryeministrit të Kosovës, ka vdekur të martën pasdite (29 janar 2013), në rrethana të dyshimta në lagjen Aktash të kryeqytetit, duke rënë nga kati i nëntë i ballkonit të tij.

(er.nu/koha/BalkanWeb)