Mandarina, sa e shijshme po aq e shëndetshme

Veç aromës dhe shijes së saj të veçantë, mandarina është mjaft e pasur me vitamina dhe përbërës tjerë të shëndetshëm, ndërsa është vërtetuar edhe se mbron nga kanceri i mëlçisë.

Mandarina, sa e shijshme po aq e shëndetshme

Mandarina (Citrus reticulata) është një peme drunore që i përket familjes së agrumeve. Ajo është e njohur për aromën dhe shijen e saj të veçantë të frutave. Ka shumë varietete të saj, me forma dhe madhësi të ndryshme.

Mjekësia tradicionale: Ky frutë ka një histori të gjatë në mjekësinë tradicionale kineze. Dikur përdorej për terapinë e dispepsisë (probleme në tretjen e ushqimeve), të diarresë, kundër të vjellave dhe çrregullimeve gastroenterike. Për më tepër, konsiderohej ilaçi ideal për lemzën, kollën dhe kongjestionin.

Të rejat e viteve të fundit: Sipas një studimi japonez, mandarina zvogëlon shfaqjen e kancerit të mëlçisë. Sipas ekspertëve, sekreti fshihet tek nje lloj lënde e quajtur beta-karoten, e cila i jep frutës ngjyrën karakteristike portokalli.

Përbërësit tjerë: Mandarina përmban në sasi të mëdha edhe vitaminën C, flavonoide, acide, kalium, magnez dhe vitaminat B1,B2 dhe B3.

Dobitë shëndetësore: Mandarina qetëson nga dhimbjet, vepron kundër diarresë dhe këlbazës, ndërkohë që është ideale edhe për përballimin e të vjellës mëngjesore (është e sigurt gjatë shtatzënisë). Vaji i saj ndihmon në raste të të rrahurës së shpejtë të zemrës dhe të tensionit të lartë të gjakut, ndërkohë që është edhe tonifikues.

Kujdes! Lëkura e saj te disa njerëz mund të shkaktojë reaksion alergjik, i cili shfaqet me teshtitje, kollë dhe shqetësim në kraharor.

Vërejtje: Kujdes në ruajtjen e mandarinave. Mandarinat nuk ruhen për shumë kohë, sepse thahen dhe mblidhen nga brenda. Ruajini në ndonjë vend që ajroset (brenda ose jashtë frigoriferit) dhe mos i mbyllni në qeska, sepse prishen më lehtë.