Salihu nuk i ndal akuzat

Nuk e ka ndërmend të ndalet. Fjala është për ish-boksierin e mirënjohur Aziz Salihu, i cili edhe një herë ka shprehur zhgënjimin e tij ndaj njerëzve që po e udhëheqin shtetin dhe sportin tonë.

Ai këtë qeveri e ka quajtur si qeveri antisportive, pasi që asnjëherë nuk po interesohet për ta duke e lënë rrugëve dhe në mëshirë të fatit. “Ndoshta e kam tepruar me këto ankesa, por vërtet jam i shtyrë nga halli dhe inati, se si unë kam bërë kaq shumë për këtë shtet e ky ma kthen me të keq. Unë sot i kam të gjitha dyert e mbyllura, madje nuk më pranon as të flas, as kryeministri, as ministri i sportit e as kryetari i komunës, të gjithë m’i kanë mbyll dyert”, tha Salihu.


“Dëgjova se Ministria e Sportit po më akuzon që unë marr një pension nga shteti i Maqedonisë, madje ata kanë thënë se ose duhet të jetë i yni ose i atyre. Po harron ajo ministri se shumë njerëz që punojnë aty marrin nga 3-4 paga me nga 3-4 funksione të ndryshe”, tha legjenda e boksit, duke e sqaruar edhe punën e pensionit.

“Maqedonisë i kam sjellë medalje evropiane dhe ballkanike për këtë ata më kanë shpërblyer. Ndërsa Kosovës sa e sa medalje i kam sjellë dhe nuk më duan. Edhe Serbia më ka ofruar pension por e kam refuzuar”, tha Salihu.

Sa u përket rekomandimeve të fundit, të aprovuara në Kuvendin e Kosovës, ku aty parashihet edhe të ndahen pensione për sportistët meritorë, Salihu ka thënë se ajo shumë e ndarë është për të ardhur turp.

“Është mirë që më në fund folën për sportin në parlament, por shuma prej 500 eurosh pension për sportistët meritorë është vërtet e turpshme. Po dëshirojnë ta ndalin Majlinda Kelmendin me 150 euro pagë, derisa asaj i ofrohen miliona nga të tjerët. Kjo dëshmon se ata nuk janë të interesuar për rininë dhe sportin tonë”, tha Salihu, i cili për fund ka njoftuar se më 15 prill në orën 16:00 në sheshin “Zahir Pajaziti”, do të organizojë një turne të boksit në nderim të presidentit të Turqisë, Taip Erdogan i cili vazhdimisht po del në mbrojtje të shtetit tonë dhe ne duhet të jemi mirënjohës për të. E.Ll.