“Të ka lali shpirt”, gati 12 milionë klikime

nga Alberti Mon 25 Mar 2013 - 8:57

Dueti i Silva Gunbardhit me Mandin e Nishtullës, “Të ka lali shpirt”, vazhdon të mbledhë me miliona vizitorë dhe së shpejti pritet të kalojë shifrën rekorde prej 12 milionë shikimesh. Kënga në fjalë, pavarësisht kritikave dhe komenteve të ndryshme rreth saj, bëhet kështu videoja më e shikuar shqiptare për një periudhë të shkurtër, me mbi 11 milionë klikime brenda një periudhe dy muajsh. Ky numër klikimesh i arritur brenda dy muajsh është një rast i veçantë për një video shqiptare, dhe shumë larg “rivalit” më të madh, duetit Sinan Hoxha dhe Meda, “Kuq e zi”. Kjo e fundit mbetet videoklipi më i shikuar me rreth 12 milionë e tre mijë klikime, megjithatë të arritura brenda një periudhe njëvjeçare.

“Të ka lali shpirt” aktualisht ka mbi 11 milionë e 930 mijë shikime, që mund ta thyejë rekordin brenda një jave.

Sipas të dhënave të ofruara për Panorama Plus nga Aldor Nini, drejtuesi i kompanisë “AcroMax” e cila mban të drejtat autoriale për videoklipin e këngës në YouTube, rreth gjysma e shikuesve vijnë nga Shqipëria dhe Kosova, ndërsa pjesa tjetër nga diaspora.