Kërcënon shefin me vrasje, i ndërrohet vendi i punës

Kërcënon shefin me vrasje, i ndërrohet vendi i punës

Komisioni disiplinor i Drejtorisë së Bujqësisë në Komunën e Gjilanit, ka shqyrtuar ankesën e kësaj drejtorie ndaj punëtorit të saj, Sylejman Idrizi, roje pylli në fshatin Llashticë të Gjilanit, i cili dyshohet se e ka dëmtuar pronën komunale me paramendim, se ka dhënë deklaratë të rrejshme rreth konflikti të interesit, nuk ka respektuar parimet dhe kushtet e sjelljes profesionale të nëpunësit civil, si dhe ka kërcënuar më 15 shkurt të këtij viti me vrasje shefin e sektorit të pylltarisë, Shemsedin Qerimin, të cilin kërcënim, sipas provave, e ka bërë në prezencën e dy kolegëve të tij.
Por, ky komision i ka mohuar të gjitha veprat që i vihen në barrë Idrizit, pasi që, sipas dëshmisë së të akuzuarit, nuk qëndrojnë faktet se ai ka munguar nga vendi i punës, se ka dëmtuar pronën komunale, se kurrë nuk ka dhënë deklaratë të rrejshme para askujt, se nuk ka konflikt të interesit, se nuk ka shkelur parimet e sjelljes profesionale në punë etj.

Gjithashtu Idrizi ka mohuar se ka kërcënuar shefin e tij, por ka pranuar faktin se gjatë bisedës e ka ngritur tonin më lart se në bisedat e zakonshme.

”Nuk qëndron fakti se i jam kërcënuar me vrasje shefit”, ka thënë Idrizi, transmeton rajonipress.

Duke grumbulluar të gjitha deklaratat, provat dhe faktet e këtij rasti komisioni disiplinor ka vendosur që Sylejman Idrizi është përgjegjës për lëndim të rëndë të detyrave të punës, dhe është përgjegjës për procedurat disiplinore të shërbimit civil, etj.

Mirëpo, Komisioni disiplinor nuk ka mundur të vërtetojë që Idrizi ka dëmtuar pronën komunale, se ka dhënë deklaratë të rrejshme dhe se ka shkelur parimet etike në punë. Duke pasur për bazë këto prova, Idrizit i është shqiptuar masa disiplinore “largim nga zyra dhe transferim në një lokacion tjetër, me detyra të ngjashme dhe ndalim i gradimit për një vit”.