“Vrasësi i Brazilit” nderohet në “Maracana”

San Paolo, 30 dhjetor - Ka qenë një nga ndeshjet më tragjike të historisë së futbollit, pasi një këmbë e shtrirë që drejtoi topin në rrjetë, ngriu zemrat e një populli të tërë, duke bërë që në Brazil të pllakosë heshtja e vajit për shumë kohë.
Ai quhet Alcides Ghiggia dhe ka qene pjese e kombëtares se Uruguait në finalen historike të vitit 1950 në stadiumin “Maracana”. Mund të cilësohet edhe si “makthi” i një populli të tërë pasi goli i tij fiksoi rezultatin e finales në 2-1 për miqtë e Uruguait, duke e kthyer në tragjedi atë natë që ishte planifikuar për festë.
“Tre persona kanë bere që Maracana të heshte, Frank Sinatra, Papa dhe unë”, tha disa kohë më parë Ghiggia. Por tashmë kanë kaluar 60 vjet dhe Brazili nuk ka ndërmend të jetojë me këtë meritë të vjetër. “Vrasësi i Brazilit”, siç e ka cilësuar “Globoesporte”, do të lërë shenjen e tij të këmbës në trotuarin e yjeve pranë stadiumit “Maracana” përkrah legjendave si, Figueroa, Eusebio e Beckenbauer.
“Duke parë atë që ndodhi, nuk mendoja se do të më kishin nderuar në Maracana. Jam i emocionuar dhe i falënderoj për këtë”, u shpreh 83 vjeçari.