Moti i keq, probleme me rrugët dhe me energjinë

Vështirësi në qarkullimin e automjeteve, zona të thella të izoluara nga bora dhe një pjesë tjetër pa energji elektrike është gjendja në Shqipëri pas reshjeve të fundit. Sipas burimeve nga Kukësi, moti i keq ka shkaktuar ndërprerje të furnizimit me energji elektrike në qark.
Qyteti është zgjuar pa drita, si pasojë e një defekti në linjën e transmetimit. Lajmin e konfirmojnë edhe burime të OST-së, të cilat njoftojnë se po punohet për kthimin e situatës në normalitet. Probleme të njëjta janë shënuar edhe në Fushë-Arrëz e Tropojë ku banorët ankohen për mungesën e energjisë.
Ndërkohë, bora në zonat e thella ka shtruar mirë. Trashësia ka arritur deri në 30 centimetra duke shkaktuar vështirësi në qarkullim. Policia këshillon përdorimin e zinxhirëve në akset Kukës-Qafë Mali dhe Qafë Shllak-Qafë Mali.