Rrëshqitje dheu dhe erozion në Shqipëri

Moti i keq me shira të dendur, borë e stuhi ka krijuar sërish probleme në shumë zona të Shqipërisë, duke krijuar vështirësi në jetën e përditshme të banorëve të tyre.
Fenomeni më i ri kësaj here është ai i rrëshqitjes së tokës prej erozionit që tani po gërryen në thellësi.
Në fundjavë masive të konsiderueshme dherash u shkëputën nga Kodra e Durrësit në zonën e Plazhit të Currilave dhe banorët u larguan nga shtëpitë e tyre me panik. Dheu i shkëputur nga Kodra e Shkëmbit të Kavajës bllokoi në fundjavë hekurudhën ndërsa banorët në disa zona të Lushnjës dhe Mallakastrës u evakuuan po prej rrëshqitjeve të dherave.
Ndërkaq bora e ditëve të fundit ka bllokuar si rëndom komuna të tëra në rrethet e Dibrës dhe Kukësit. Ngarkesa e madhe në rrjet prej të ftohtit ka shkaktuar defekte elektrike që kanë lënë pa energji në fundjavë Bulqizën, Matin dhe një pjesë të Peshkopisë.
Meteorologët thonë se edhe për katër ditë të tjera reshjet do të vazhdojnë ndërsa konstaton se një dimër i tillë, me kaq shumë reshje, nuk është parë që nga dimri i 1985-s.