Shqipëri: Bllokohen disa rrugë nacionale

Katër segmente nacionale raportohen si të bllokuara tërësisht për shkak të shembjeve të tokës dhe masiveve të dheut të rëna në shtratin e rrugës.
Sipas Ministrisë së Transporteve, është bllokuar aksi Pukë-Fushë -Arrëz, 2 kilometra në dalje të qytetit nga shembja e trupit të rrugës.
I bllokuar është edhe aksi, Qafë- Mali Fierzë. Rruga Lozhan-Moglicë është bllokuar nga shkatërrimi i një ure, ndërsa aksi Librazhd-Peshkopi është bllokuar nga bora.
Nderkohë, kalohet me vështirësi në akset, Burrel-Klos. Unaza i qytetit të Bulqizës është përmbytur nga ujërat.
Rruga Shëngjin-Kunë është bllokuar nga dalja e detit. Në rrugën Fushë-Arrëz - Iballë lumi ka grryer rrugën dhe aty mund të kalojnë vetëm mjetet e vogla.
Me një kalim mund të kalohen edhe në aksin Gjirokastër-Tepelenë ku sërish ka shembje dhe baltë.
Dëmtim të rëndë ka pësuar edhe rruga e re Vlorë-Orikum për shkak të shembjes. E njëjta situatë është edhe në rrugën Sarandë-Qafë Muzinë, Vlorë-Selenicë, Vlorë-Tepelenë, Vlorë- Borsh, Poliçan-Çorovodë, si dhe Rrëshen-Kurbnesh.
Drejtoria e Përgjithshme e Rrugëve dhe kompanitë kontraktore janë duke punuar pë riparimet.