Disidentët kubanë në grevë urie

nga Li12i-GG ARMY Sat 27 Feb 2010 - 0:06

Havanë, 27 shkurt - Disa disidentë kubanë thonë se do të refuzojnë ushqimin në shenjë proteste për vdekjen më herët gjatë kësaj jave të një kundërshtari qeveritar të burgosur.
Grupi opozitar, Komisioni kuban për të Drejtat e Njeriut tha se katër disidentët e burgosur do të refuzojnë ushqimin.
Një tjetër aktivist anti-qeveritar, i cili nuk është në burg, ka deklaruar se edhe ai do të refuzojë ushqimin dhe pijet.
Orlando Zapata Tamayo vdiq të martën në një spital në kryeqytetin Havana, pas grevës së urisë 85 ditëshe.
Vdekja e tij shkaktoi protesta ndërkombëtare dhe presidenti kuban Raul Castro shprehu keqardhje.
Katër disidentët e burgosur, të cilët planifikojnë të fillojnë grevën e urisë janë Eduardo Diaz Fleitas, Diosdado Gonzalez Marrero, Nelson Molinet Espino dhe Fidel Suarez Crus, njoftoi grupi opozitar.
Guillermo Farinas, një aktivist dhe gazetar, i cili jeton në qytetin e Santa Claras, tha se tashmë është duke refuzuar ushqimin dhe po përjeton dhimbje koke, si rezultat i kësaj.
Pesë disidentët, kërkojnë lirimin e rreth 200 të burgosurve politikë në Kubë.
Vdekja e Tamayos ka shkaktuar kritika të shumta në adresë të qeverisë kubane jashtë vendit.