Besimtarët në Poloni do t’i rrëfehen automatit

nga Li12i-GG ARMY Sat 27 Feb 2010 - 1:46

Varshavë, 27 shkurt – Polakët nuk do të kenë nevojë të shkojnë në kishë për t’u rrëfyer, pasi në internet gjendet rrëfyestorja virtuale, ndërsa në Varshavë për herë të parë në Poloni, do të ofrohet mundësia për t’iu rrëfyer automatit.
Në stacionin kryesor hekurudhor në Varshavë do të vendoset Makina e Shenjtë, e cila i ngjan bankomatit, funksionin si bankomati, por nuk jep para.
Besimtarët do të kenë mundësi, duke filluar nga 4 marsi, që të rrëfehen. Automati pastaj do t’ia shtypë një dëshmi, ku do të shkruhet se në këtë vend kanë lehtësuar shpirtin. Makina e Shenjtë, në menynë e programuar, ofron edhe mundësinë që të caktohet rrëfimi i vërtetë në kishë.
Automati i rrëfimit është i programuar të “flasë” në katër gjuhë, përveç polonishtes edhe anglisht, gjermanisht e frëngjisht. Pasi që Makina e Shenjtë është vendosur në qendër të Varshavës, para saj mund të rrëfehen edhe turistët, me të cilët prifti polak në një kishë tradicionale nuk mund të merret vesh për shkak të barrierave gjuhësore.