Gramsh: Aksident i rëndë, dyshohet për 4 të vdekur

Një aksident i rëndë automobilistik është shënuar dje në mbrëmje në aksin rrugor Mollegrabovë-Gramsh, ndërsa dyshohet se kanë vdekur të 4 pasagjeret që ndodheshin në të.
Lajmi për aksidentin u konfirmua sot. Nënprefekti i Gramshit, Shkëlqim Hoxha bëri të ditur në një linjë telefonike për TVNews24 se furgoni i linjës Mollegrabove-Gramsh doli nga rruga pranë luginës së Devollit.
"Pas kësaj automjeti ka rënë në lumë nga ku e mori rrjedha e lumit Devoll. Furgoni u gjet 1 km larg vendit të aksidentit dhe dyshohet se në të ndodheshin 4 persona. Dyshohet se kanë vdekur të katër personat që ndodheshin në automjet", tha Hoxha.
Nga i njëjti burim mësohet se viktimat mund të jenë të moshave 14 deri në 32 vjeç.
Policia është nisur drejt vendngjarjes së bashku me një ekip mjekësor, ndërsa forca të specializuara të zhytjes po kërkojnë për trupat në lumë.
Nënprefekti i Gramshti bëri të ditur se terreni ku ka rënë automjeti është shumë i vështirë dhe vetëm sot u arrit të sinjalizohej për humbjen e tij.