Godo: Zgjidhja e krizës vjen vetëm nga ndërkombëtarët

Parlamenti nuk është një fushë futbolli, dhe për këtë arsye Partia Socialiste nuk mund të pasojë topin. Me këtë koment bashkëhartuesi i Kushtetutës, politikani Sabri Godo e përkufizon hyrjen njëorëshe të opozitës në Parlament, veprim të cilin e quan mungesë të theksuar serioziteti.
"Shkuan atje për të thënë që tani ia lëmë topin Berishës. Këtu nuk luhet futboll, kemi të bëjmë me fatet e këtij vendi dhe kjo nuk më duket aspak serioze", tha Godo.
Tashmë është e qartë sipas Godos, që presidenti nuk mund të bëjë më asgjë për të zgjidhur krizën. Zgjidhje e cila tashmë mund të vijë vetëm nga Komisioni i Venecias.
"Unë nuk besoj se presidenti do të mund të çojë më tej këtë çështje, presidenti bëri ata që i thanë të bënte. Nuk e di pse socialistët refuzojnë ti referohet kjo çështje Komisionit të Venecias, meqenëse tashmë është e qartë që ky konflikt mes PD dhe PS këtu brenda nuk do të zgjidhet. Atëherë doemos duhet të kërkojmë një arbitër dhe kjo nuk më duket ndonjë gjë anormale", vijoi Godo.
Konflikti mes PD dhe PS mund të degradojë nëse çështja nuk kalon në dorë të ndërkombëtarëve. Por ajo që Rama duhet të bëjë është kthimi përfundimtar në Kuvend, sipas rekomandimeve dhe të miqve të tij në Evropë. "Duket se PS nuk e merr parasysh as këtë thirrje të miqve të saj, kështu që shkon drejt një vetëizolimi gjithnjë e më të madh", përfundoi Godo