Delegacioni i PE-së: Kriza dhe vizat

Cështja e liberalizimit të vizave dhe situata politike në vend ishin dy ceshtjet më të rëndësishme të diskutuara nga Delegacioni i Parlamentit Europian me autoritetet më të larta shqiptare. (UPDATE)


Përsa i përket situatës politike, nga takimet e sotme të delegacionit me Presidentin Topi, kryeministrin Berisha dhe kryeparlamentaren Topalli, është i përbashket apeli i Brukselit qe dialogu i nisur të vazhdoje, duke i dhënë zgjidhje përfundimtare kësaj situate.

Sic thuhet në njoftimin zyrtar, Presidenti Topi është shprehur se zgjidhja institucionale do t’u shërbente interesave të qytetarëve shqiptarë.

Berisha: Hetim nga 100 prokurorë

Në njoftimin e kryeministrit thuhet se kreu i qeverise i beri me dije eurodeputetët për vendosmërinë e qeverisë për të dhënë të gjithë mbështetjen e nevojshme buxhetore dhe institucionale për 100 prokurorë, të cilët në mënyrë të pavarur dhe të paanshme, sipas kryeministrit, të hetojnë dhe të realizojnë në mënyrë sa më të shpejtë transparencën.

Kryeministri garantoi eurodeputetët për angazhimin e plotë të qeverisë për respektim të plotë të Kushtetutës në punën e komisionit hetimor për zgjedhjet.

Topalli: Socialistët të jenë pjesë e komisionit

Kryetarja e Kuvendit, Jozefina Topalli, i tha delegacionit se ka ftuar deputetët socialistë të bëhen pjesë e komisionit hetimor për zgjedhjet, sipas parimeve të vëna në dukje nga Komisioneri për Zgjerimin, Shtefan Fyle, transparenca e plotë dhe respekti i Kushtetutës.

Europarlamentarët thanë se ishin te impresionuar nga arritjet e Shqiperise në përmbushjen e kushteve teknike per liberalizimin e vizave, vecanerisht per progresin e bere qe nga muaji dhjetor.