Bie konsumi, pakësohen blerjet për veshje

Të dhënat më të fundit zyrtare të Institutit të Statistikave konfirmojnë se kriza ka goditur konsumin e familjarëve, të cilët për herë të parë këto vitet e fundit kanë pakësuar blerjet.

Sipas të dhënave zyrtare tregtia me pakicë ra në tremujorin e katër të vitit të kaluar me 3 për qind krahasuar me një vit më parë, kur dy vitet e mëparshme tregtia ishte rritur me shifra dyshifrore.

Të dhënat tregojnë se familjarët po pakësojnë blerjet pikërisht për ato produkte, të cilat quhen si më pak të domosdoshmet. Rënien më të fortë e kanë patur shitjet e vjeshjeve të cilave në tremujorin e katërt të vitit 2009 ishin 65 për qind më të ulëta në volum se sa e njëjta periudhë e një viti më pare, cka është shoqëruar dhe me ulje të ndjeshme të punësimit, gati 23 për qind për këtë sektor.

Rënie ka patur edhe për pajisjet elektro-shtëpiake, ndonëse në ritme të lehta. Sipas INSTAT, në tremujorin e katërt të 2009-ës shitjet me pakicë të këtij grupi produktesh ranë me 1.1 për qind në sasi, krahasuar me tremujorin e katërt 2008.

Për zërat e tjerë, si ushqimet, produktet farmaceutike, dhe karburantet INSTAT thtë se tregtia është rritur krahasuar me një vit më parë. Rritja e përvitshme e konsumit ka qenë burimi kryesor i rritjes ekonomike në Shqipëri.

Por Banka e Shqipërisë thotë se rënia e të ardhurave si pasojë e krizës ka goditur kërkesën për konsum, ritmet e të cilës vështirë se do të kthehen në të njëtat nivele si përpara krizës. Ndaj në më shumë se një rast banka kë bërë thirrje për një rioritenim të ri të ekonomisë, që më shumë se sa konsumi duhet të mbështetet tek rritja e prodhimit të brendshëm.