Korçë, nis hetimi: Ish-kryetari i Omonia, korrupsion e falsifikime me vizat

KORÇE – Drejtoria e Policisë së Korçës deklaroi sot se ka nisur hetimet për korrupsion ndaj ish-kryetarit të organizatës “Omonia” në Korçë pas dyshimeve se ai ka abuzuar me vizat e përfituara nga persona të ndryshëm për udhëtime në Greqi.
“Kanë filluar veprimet hetimore procedurjale, në gjendje të lirë për shtetasin Spiro Liçi, i datëlindjes 9 qershor 1948 banues në Korcë, sepse ne baze të informacioneve të marra, ky shtetas ka abuzuar me detyrën e tij si kryetar i organizatës Omonia të qytetit te Korces”, njoftuan burimet zyrtare të policisë.
Sipas tyre abuzimi është kryer nga kryetari i shkarkuar pak ditë më parë nga organizata Omonia, duke nxjerre viza për në shtetin Grek, personave që nuk janë anetare te kesaj organizate, duke mos ju prerë faturë për paratë që personat paguajnë për vizat.
Policia bëri me dije se i dyshuari u ka falsifikuar dokumentet qytetarëve duke i paraqitur ata si anëtarë të organizatës Omonia me qëllim për t`ju lehtësuar marrjen e vizave për në Greqi.
Akuza e ngritur ndaj kreut të Omonia në Korçë, është “ushtrim i ndikimit te paligjshëm ndaj personave që ushtrojnë funksione publike”.