Kryetari i LDK-së e padit "Lajmin" për shpifje

Kryetari i Lidhjes Demokratike të Kosovës (LDK), Fatmir Sejdiu, do ta padisë në gjyq të përditshmen “Lajm”, për shkak të një shkrimi të botuar sot.

Gazeta e përditshme "Lajm", nëpërmjet një artikulli të botuar sot në faqen 3 dhe të paralajmëruar edhe në ballinë, i ka servuar opinionit një mori të pavërtetash dhe shpifjesh tendencioze, me qëllim të denigrimit të personalitetit të dr. Fatmir Sejdiut, Kryetar i Lidhjes Demokratike të Kosovës dhe President i parë i Republikës së Kosovës, raporton agjencia e lajmeve QIK, organ i LDK-së.

“Duke i cilësuar si shumë të ulta shpifjet që ka bërë kjo gazetë ndaj tij, dr. Fatmir Sejdiu e ka paditur gazetën ‘Lajm’, e cila ka botuar këtë tekst krejtësisht të paargumentuar”.

Kryetari i LDK së do ta procedojë padinë e tij private ndaj gazetës "Lajm" në gjykatën kompetente.

Në shkrimin me titull “Filterët e Fatmir Sejdiut”, “Lajm” shkruan sot në ballinë se burime të informuara mirë të gazetës, bëjnë të ditur se familja e ish-presidentit Fatmir Sejdiu, nga ardhja e tij në krye të vendit, ka krijuar një pasuri disamilionëshe!

Ai ka në pronësi një sipërfaqe të madhe toke në Çagllavicë, vilën në Prevallë, kompaninë “London Taxi” në Prishtinë, por është në rrugë të mirë për t’i menaxhuar filterët e çajit dhe të kafes nga Malavi, shkruan më tej “Lajm”.

Gazeta, gjithashtu thekson se “për opinionin mbeti enigmë edhe qëllimi i përpjekjes së dështuar të ish-presidentit Sejdiu për një vizitë joprotokollare në bregdetin shqiptar”.