Berat, probleme për realizimin i investimeve

Mosmiratimi i projektbuxhetit të vitit 2010 ka krijuar probleme për realizimin i investimeve në punë publike nga Bashkia e Beratit.

Ndonëse kanë kaluar 3 muaj nga ky vit, anëtarët e këshillit bashkiak nuk kanë arritur ende të miratojnë buxhetin që do t’u hapë rrugën investimeve, fondet e të cilave janë bllokuar krejtësisht.

Por, mbi të gjitha mungesa e buxhetit po ndihet mbi supet e qytetarëve, një pjesë e të cilëve nuk po marrin ndihmën ekonomike dhe kompensimin e energjisë elektrike.

Në këto kushte 3400 familje beratase nuk kanë marrë ndihmën ekonomike për muajt shkurt dhe mars.

Ndërkaq, kreu i Bashkisë së Beratit, Fadil Nasufi, thotë se nga ky mosmiratim janë bllokuar të gjitha investimet që priteshin të realizoheshin në tremujorin e parë të vitit 2010.

Moslëvrimi i fondeve nga bllokimi i buxhetit ka lënë në gjendje të mjerë infrastrukturën e rrugëve brenda qytetit. Sipas kreut të bashkisë, një pjesë e mirë e rrugëve brenda qytetit sipas projekteve të bashkisë do të rikonstruktoheshin në këtë fillimviti, por situata e krijuar ka bllokuar punimet.

Po kështu probleme kanë dalë dhe me moslëvrimin e fondeve për pastrimin e qytetit, vijëzimin e rrugëve, gjelbërimin etj. Për të gjitha këto probleme, Nasufi thotë se “veprimet e papërgjegjshme të këshilltarëve të PD-së dhe LSI-së po bien mbi të gjitha mbi supet e qytetarëve të Beratit”.

Ai shton se “Vetëm në mbledhjen e fundit të këshillit bashkiak kishim për të kaluar në miratim pika tepër të rëndësishme siç është vendimi mbi dhënien e ndihmës ekonomike, vendimi për fondin e emergjencave civile dhe ai për sistemin e pikëzimit për qytetarët e pastrehë”.