Rama në Durrës: Ekonomia bie, varfëria rritet

Ashtu sic kishte paralajmëruar, Partia Socialiste nxorri në rrugë këngët dhe pankartat e protestave.

Partia Socialiste nuk synon të ndryshojë rezultatin e zgjedhjeve në tavolinë, por nuk e fsheh se nëpërmjet protestave, synon ta rrëzojë qeverinë. Në lagjen e ish-Kënetës në Durrës, kryetari i partisë Edi Rama, u ndal gjatë në kushtet e vështira që sipas tij kanë pllakosur në Shqipëri pas 28 qershorit. Zoti Rama u shpjegoi të pranishmëve se një qeveri që nuk ka nevojë për votën e popullit, sepse e manipulon atë si t'i dojë qejfi, është një qeveri e papërgjegjshme përpara popullit.

Sipas kreut të socialistëve, kutitë e votimit kanë brenda rrënjët e të keqes që sipas socialistëve ka pllakosur Shqipërinë. Në këtë miting proteste zoti Rama tha se që prej 28 qershorit, qeveria jo vetëm nuk hapi kutitë, por nuk hapi as vende të reja pune, duke i zhytur shumë njerëz më shumë në varfëri.

Ndaj kryetari i Partisë Socialiste i ftoi banorët e lagjes së Kënetës në Durrës, që të marrin pjesë edhe në mitingun e madh të Durrësit dhe atë të 30 prillit në Tiranë. Ne do të takohemi në Tiranë, tha zoti Rama, dhe nuk do të ndalemi pa bërë transparencë për të hapur kutitë, për të larguar qeverinë, për të ndalur rrënimin ekonomik. Mitingje të tillë, Partia Socialiste ka thënë se do të bëjë vazhdimisht përgjatë këtij muaji për të kulmuar më 30 prill në kryeqytet.