Kushtetuta, bazë e të drejtave dhe i lirive të të gjithë qytetarëve

Me rastin e dyvjetorit të Kushtetutës së Republikës, presidenti Sejdiu organizoi një pritje për ambasadorët e akredituar në Kosovë, përfaqësuesit e institucioneve ndërkombëtare, deputetët, ministrat dhe përfaqësuesit e jetës politike e shoqërore të vendit.
“Kushtetuta e Kosovës është garanti dhe fondamenti bazik i të drejtave dhe i lirive të të gjithë qytetarëve të vendit tonë, e cila i ka hapur kahet e zhvillimit të Republikës së Kosovës. Kushtetuta është tapi e Kosovës”, theksoi Sejdiu, duke vlerësuar rëndësinë e miratimit të aktit më të lartë juridik të vendit tonë si akt historik, i cili shpreh vullnetin e popullit të Kosovës.
Sejdiu tha se Kushtetuta e vendit është garanci për fjalën e lirë, lëvizjen e lirë, formulë për sundimin e ligjit dhe zhvillimin e lirë të vendit në të gjitha fushat.
Kushtetuta e miratuar dhe veprimet e institucioneve të Kosovës për zbatimin e saj, kanë dëshmuar se Kosova e ka mbajtur fjalën e saj që Plani i Ahtisaarit të zbatohet në përpikëri.
Sipas Presidentit Sejdiu, procesi i hartimit të Kushtetutës ka dëshmuar bashkëpunimin e fuqishëm në mes Kosovës dhe miqve ndërkombëtarë dhe se do të ketë mbështetjen e popullit të Kosovës dhe të miqve të Kosovës.