Sejdiu kërkon njohje nga Sllovakia

Presidenti Fatmir Sejdiu u takua me ministrin e Jashtëm të Sllovakisë, Miroslav Lajcak, të cilit, edhe një here, ia përsëriti kërkesën e Kosovës për njohje nga Sllovakia.
Duke folur për të arriturat dhe sfidat që ka pasur Kosova gjatë dy viteve të pavarësisë, Sejdiu theksoi se në Kosovë është ndërtuar një realitet pozitiv që ka kontribuar në rritjen e stabilitetit dhe paqes në rajon, kurse rrota e historisë nuk mund të ndalet e as të kthehet prapa.
Veç të tjerash, Sejdiu e njoftoi ministrin Lajcak për përpjekjet dhe të arriturat e institucioneve të Kosovës për integrimin e pakicave, si dhe për obstruksionet e Serbisë, e cila po i mban peng qytetarët serbë të Kosovës duke i ushqyer ata me iluzione dhe duke mbështetur strukturat paralele.
Presidenti i vendit edhe një herë theksoi bashkëpunimin e shkëlqyeshëm që Kosova ka me shtetet e tjera të rajonit dhe gatishmërinë e saj për pjesëmarrje në forume rajonale dhe ndërkombëtare në baza të barabarta me shtetet e tjera.
Nga ana e tij, ministri Lajcak theksoi rëndësinë e bashkëpunimit rajonal dhe shprehu interesimin e Sllovakisë për bashkëpunim të gjithanshëm me Kosovën dhe në veçanti në fusha që do të lehtësonin jetën e qytetarëve të të dy vendeve. Ai shtoi se pajtohet që rasti i Kosovës është sui generis dhe nuk mund të shfrytëzohet si precedent për asnjë vend tjetër.