Gati për punë roboti-kirurg

Ndodh për herë të parë në Britaninë e Madhe dhe mbart dy rreziqe të mëdha me vete… Bëhet fjalë për robotin-kirurg që do të kryejë një ndërhyrje kirurgjikale në zemrën e një pacienti, në “Glenfield Hospital”, Leicester, Britani e Madhe. Është komunikuar zyrtarisht nga ky spital se roboti i prodhuar në New Jersey, do të operojë zemrën e një njeriu që vuan nga crregullimi i ritmit kardiak. Roboti do të komandohet nga një kirurg (njeri) jashtë sallës së operacionit, me anë të kompjuterit.
Dy rreziqet e përmendura më lart janë sigurisht gjigande, e deri diku fatale. Së pari, bëhet fjalë për një robot (hekur, plastikë, elektronikë), që do të mbajë në duar bisturinë e do të operojë një njeri pikërisht në organin më jetik: zemrën. Së dyti, bëhet fjalë për një robot-kirurg që do të bëjë punën e njeriut. Imagjinoni të shtohen shumë këta të fundit në të gjitha fushat. Njerëzit do të falimentonin nga ana profesionale…