Topalli: Shqipëria, një hap afër Evropës

Dita e Evropës e gjen Shqipërinë një hap më afër saj- është mesazhi që ka përcjellë kryetarja e Kuvendit, Jozefina Topalli, gjatë një takimi me studentët dhe pedagogët e Masterit të Studimeve Evropiane, pranë Universitet të Tiranës, në cilësinë e të ftuarës speciale.
“9 maji, është një ditë krejt e veçantë. Ishte 9 Maj 1950 kur Robert Shuman mban një fjalim të bazuar mbi idetë themelore të Zhan Monesë, mbi atë që do të ishte Evropa e Bashkuar, ndaj dhe unë e konsideroj 9 majin një datëlindje të Evropës. 9 Maji është vërtet dita e Evropës, për të cilën ne shqiptarët kemi shumë për të thënë”, u shpreh Topalli.

Kryeparlamentarja theksoi se që nga rënia e komunizmit e deri më sot, asnjë ka vend tjetër nuk ka bërë një rrugë kaq të gjatë në një kohë kaq të shkurtër.

“Vetëm për një vit kemi ngjarje të jashtëzakonshme. Në prill të 2009-ës dorëzuam kërkesën për marrjen e statusit të vendit kandidat, më 28 qershor bëmë zgjedhjet më të mira që Shqipëria ka pasur, më 26 nëntor të 2009-ës mblidhet Këshilli dhe i kërkon Komisionit Evropian, opinionin për statusin e vendit kandidat. Më 18 dhjetor 2009, Komisioni dorëzon pyetësorin, pak javë më parë ne dorëzuam në Komision përgjigjet e pyetësorit, ndërkohë që ka ardhur raporti për liberalizimin e vizave, me vlerësimin ‘exelent’, shkëlqyeshëm, në të gjitha blloqet e këtij raporti dhe tashmë, pritet ajo që, ne shqiptarët kemi kohë që e presim, lëvizjen e lirë”, është shprehur Topalli