Tiranë, përshkallëzohet protesta e opozitës

Mijëra mbështetës të opozitës kanë dalë në sheshin kryesor të Tiranës për të marrë pjesë në protestën e radhës. Protesta që përkon me Ditën e Evropës, thekson kërkesat e opozitës për zgjedhjet si edhe pakënaqësinë ndaj qeverisjes së kryeministrit Berisha.
Numri i grevistëve të urisë që janë dërguar në spital për shkak të përkeqësimit të gjendjes shëndetësore është në mbi 11. Në tendat e ngritura para kryeministrisë 22 deputetë të opozitës dhe 180 përkrahësve të tyre kanë më shumë se një javë që ndodhen në grevë urie.

Kreu i Partisë Socialiste, Edi Rama, ka deklaruar se grevës do t’i shkohet deri në fund dhe se është i gatshëm për dialogun që do të zgjidhte krizën përmes transparencës së zgjedhjeve.

“Kjo protestë nuk është si përpjekjet e tjera. Sot në 9 maj, në zemër të Shqipërisë, në mes të bulevardit është ngritur një çadër që bën historinë dhe në krah të majtë de të djathtë qëndrojnë dy godina të dy pushteteve të cilat Kushtetuta i përcakton si pushtete të popullit, ndërkohë sot ne ndjejmë shohim dhe prekim se nga këto dy godina jo vetëm nuk dalin ligjet që ne duam, që nuk zbatohen por dalin fantazmat e një frike që shpërndahet kudo”, u shpreh Rama.

Ndërkaq shumica kërkon nga kreu i PS-së të bëjë transparencën e shëndetit të grevistëve.

Të premten, presidenti i vendit Bamir Topi nisi bisedimet me përfaqësues të politikës shqiptare dhe të komunitetit ndërkombëtar.

Topi është takuar me zëvendëskryeministrin dhe ministrin e jashtëm Ilir Meta, e me pas me ambasadorin amerikan Withers, atë spanjoll Montobio si dhe kreun e KE-së në Tiranë Lohan, duke synuar uljen e tensionit dhe zgjidhjes së krizës politike në vend.