Apple humbet një tjetër prototip të iPhone

Muajin që shkoi Gizmodo arriti që të kap në duar një prototip të gjeneratës së ardhshme të iPhone, apo ndryshe si po njihet iPhone 4G, dhe me këtë rast u shkaktua mjaft zhurmë në internet, e Apple ishte më e pakënaqura në këtë përzierje.
Tani duket se një prototip tjetër iPhone 4G është paraqitur në internet, dhe ky duket se është një version më i ri sesa ai që kemi parë kohë më parë.

Një ueb faqe vietnameze e quajtur Taoviet ka postuar imazhe të prototipit të ri të iPhone, padyshim një model më i ri sesa ai që kemi parë, dhe siç mund të shihet, ky ka të shkruar në shpinë 16GB. Ata madje e kanë copëtuar pajisjen për të paraqitur edhe procesorin e brenduar nga Apple.

Sot gjithashtu është paraqitur edhe një video, ku shihet se porti për SIM kartelë është anash mbështjellësit të pajisjes dhe madhësia e iPhone 4G duket se është mjaft e ngjashme me gjeneratën e tanishme 3GS.
MacRumours thekson se celularit është blerë në SHBA nga një biznesmen Vietnamez, dhe Taoviet thekson se ka të tjerë në tregun e zi, që shkojnë diku për një çmim prej 4.000 dollarësh.