Me art në ndihmë SOS Fshatit të Fëmijëve

“Pak nga ju vlen shumë për mua” është
motoja e fushatës e cila edhe këtë vit do të organizohet nga “SOS
Fshatrat e Fëmijëve”. Fushata e titulluar “Java e SOS Fshatit të
Fëmijëve – Kosovë”, e cila organizohet me qëllim të mbledhjes së
fondeve për fëmijët pa përkujdesje prindërore, do të shoqërohet me
aktivitete të ndryshme kulturore.“Java e SOS…”
do të hapet sot (e mërkurë) në ambientet e “SOS Fshatit”, me ç’rast do
të organizohet një program ku do të performojnë fëmijët e “SOS Fshatit
për Fëmijë” dhe moshatarët e tyre.
Një ditë më pas, në mbështetje të
fushatës, në Teatrin Kombëtar të Kosovës do të shfaqet drama “Beselam,
pse më flijojnë”, me regji të Fatos Berishës, e “jetësuar” nga aktorë
si Çun Lajçi, Bislim Muçaj, Shkumbin Istrefi, Luan Jaha, Hazir Myftari,
Sheqerie Buçaj, Anisa Ismajli etj.
Fushata “Java e SOS Fshatit të
Fëmijëve – Kosovë”, do të përmbyllet më 28 të këtij muaji me një
koncert humanitar që do të mbahet në teatrin “Oda”. Në koncert do të
performojnë këngëtarë të rinj si Korab Shaqiri, Albatrit Muqiqi,
Valerina Smakaj, Viona Shabani, Besart Halimi etj.