Rasic premton përkrahje për fëmijët e fshatit “SOS-Kinderdorf”

Ministri i Punës dhe Mirëqenies Sociale, Nenad Rasic vizitoi të premten fëmijët e braktisur dhe pa përkujdesje prindërore që janë nën përkujdesjen e “SOS- Kinderdorf”, ndërsa theksoi se do të shikohen të gjitha mundësitë për përkrahje në aktivitetet për këta fëmijë.Anëtarët e kësaj organizate duke u mbështetur në misionin humanitar dhe programin një javor që e kanë organizuar me titull “ Java e SOS Fshatit të Fëmijëve”, kërkuan nga ministri Rasic mbështetje financiare dhe përkrahje në realizimin e këtij programi dhe programeve tjera që kanë në vazhdimësi për zhvillim të aktiviteteve, për një mirëqenie më të mirë të kësaj kategorie fëmijësh.
Rasic u zotua se do të shikohen të gjitha mundësitë për përkrahje në aktivitetet për këta fëmijë.

“Unë me të vërtetë nuk po kuptoj se si mund të braktisen fëmijët, por mund të ju them se do të vazhdojmë të përkrahim me çdo mundësi tonën në mënyrë që në të ardhmen të kemi shumë aktivitete të përbashkëta, dhe besoni se këtë do e bëjmë nga zemra”, tha Rasic.
Aktualisht në objektet e “SOS Fshatit” që financohet nga “SOS-Austria” dhe “SOS-Norvegjia” gjenden gjithsejtë 52 fëmijë të braktisur. Prej tyre 22 janë deri në moshën 3 vjeçare dhe 30 fëmijë tjerë mbi moshën 3 vjeçare.
Këta fëmijë të braktisur do të qëndrojnë deri në pavarësimin e plotë të tyre, që nënkupton deri në sigurimin e plotë të punësimit dhe strehimit të përhershëm.