Presidenti së shpejti përfundon në Gjykatën Kushtetuese

Ka mbetur vetëm çështje ditësh derisa
presidenti Fatmir Sejdiu të përfundojë në Gjykatën Kushtetuese të
Kosovës, shkruan sot “Koha Ditore”. Në orët e
pasdites të së martës janë mbledhur mbi 30 nënshkrime të deputetëve, që
kanë vendosur të kërkojnë përgjigje nga “gardiani i Kushtetutës” nëse
kreu i shtetit është duke e shkelur ose jo Kushtetutën, përmes
mbajtjes së postit të ngrirë të kryetarit të Lidhjes Demokratike të
Kosovës. Edhe pse me Kushtetutë është e përcaktuar që tridhjetë a më
shumë deputetë mund ta ngrenë çështjen e presidentit në Gjykatë,
iniciuesi i mbledhjes së nënshkrimeve, deputeti i pavarur Naim
Rrustemi, ka vendosur që edhe për pak kohë të mos e procedojë lëndën në
Gjykatë. Ai dëshiron t’i mbledhë edhe nënshkrimet e deputetëve që kanë
treguar gatishmëri për ta mbështetur nismën e tij, por që, për shkaqe
të ndryshme, nuk kanë arritur të takohen fizikisht me të.
“Pres t’i
mbledh nënshkrimet e atyre që kanë treguar interesim, e njëkohësisht
pres edhe vetëdijesimin e ‘tregtarëve politikë’, që në fakt janë
deputetët e koalicionit qeverisës, për ta bërë edhe ata të njëjtin
veprim”, ka shtuar Rrustemi. “Më shumë po pres nga LDK-ja që ta
mbështesë nismën time, sepse kësaj partie i konvenon më së shumti t’i
heqë dilemat e ngritura rreth njeriut të parë të partisë dhe shtetit”,
është shprehur ky deputet.
Iniciativa e Rrustemit për të kërkuar
interpretim kushtetues rreth funksioneve të presidentit ka nisur javën e
kaluar, dhe deri tani është mbështetur pothuajse nga deputetët e të
gjitha grupeve parlamentare. “Koha Ditore” ka arritur të sigurojë qasje
në letër-kërkesën që do t’i drejtohet Gjykatës Kushtetuese, me ç’rast
ka vërtetuar se në mesin e nënshkruesve gjendet edhe deputeti i
LDK-së, Ali Lajçi, si dhe disa deputetë të PDK-së. Pjesa dërrmuese e
nënshkruesve, megjithatë, janë nga AAK-ja dhe LDD-ja.