Walcott shënon hat-trick në fitoren e thellë të Arsenalit

nga **Binni** Sat 21 Aug 2010 - 6:03

Theo Walcott ka shënuar tre gola derisa Arsenali shkatërroi si me lojë ashtu edhe me rezultat (6-0) ekipin e promovuar këtë sezon në Ligën Premier, Blackpool, që pjesën më të madhe të ndeshjes e luajti me një lojtar më pak.

Katërshja sulmuese e Arsenalit, Chamakh, Arshavin, Rosicky dhe Theo Walcott, bënë një bashkëveprim të shkëlqyeshëm, që i mundësoi këtij të fundit t’i japë avantazhin ekipit vendas pas vetëm 13 minutash.

Me gjysmë ore lojë në Emirates Stadium, Topçinjtë dyfishuan rezultatin dhe reduktuan ekipin kundërshtar në 10 lojtarë. Edhe pse ndërhyrja e Ian Evatt në Marouane Chamakh ishte për karton të kuq, faulimi i tij ishte pak jashtë zonës së rreptësisë, por arbitri akordoi penalti, të cilën e shndërroi në gol Andrei Arshavin (32’).

Duke shfrytëzuar epërsinë numerike, vendasit shënuan edhe golin e tretë në ndeshje ndërsa Theo Walcott u shkrua në listën e shënuesve për herë të dytë (39’), pas një asistimi nga Jack Wilshere.

Golat për Arsenalin nuk ndaluan as në pjesën e dytë të takimit. Pak minuta pas kthimit nga pauza, Backary Sagna marshon në krahun e djathtë dhe asiston në zonë për Abou Diaby, i cili çoi në 4-0 avantazhin e vendasve (49').

Pas më pak se një ore lojë, Walcott pranoi një asistim nga Diabu dhe shënoi edhe një gol tjetër për të kompletuar hat-trickun e parë të tij këtë sezon (58').

Edhe pse dështoi në disa raste të mira, përforcimi i ri i Arsenalit, Chamack arriti megjithatë të shënojë edhe në ndeshjen e tij të dytë në Ligën Premier, kësaj here pas një harkimi nga këndi, për të vulosur fitoren e thellë të Topçinjve, 6-0 (82').

Fitorja është e para e Arsenalit në dy ndeshje, pasi në takimin e parë arriti vetëm një barazim 1-1 në çastet e fundit të takimit ndaj Liverpoolit, në Anfield.