Kambovski zgjidhet kryetari i ASHAM

Shkup, 2 dhjetor - Akademiku Vllado Kambovski është zgjedhur për kryetar të Akademisë së Shkencave dhe Arteve të Maqedonisë, bën të ditur INA. Pas një mbledhje dyorëshe, Kambovski, i njohur si një nga ekspertët maqedonas të drejtësisë dhe si ish-ministër i Drejtësisë, ka marrë shumicën e votave të akademikëve.

Ai do ta udhëheq ASHAM për katër vitet e ardhshme, ndërsa ka paraqitur edhe platformën e realizimit të projekteve dhe synimeve shkencore dhe akademike.

Kambovski theksoi se synim bazë do të jetë aplikimi i shkencës për shoqërinë, e cila nuk do të jetë e fokusuar vetëm në shkencë, por edhe në qëllime dhe sfida për të ardhmen.

Kambovski është profesor i së drejtës penale, ndërsa ka mbajtur poste udhëheqëse edhe në ish-RSFJ si sekretar federal për drejtësi, zëvendëskryeministër gjatë periudhës së Ante Markoviqit. Në periudhën nga viti 1998 ka qenë ministër i Drejtësisë në Qeverinë e udhëhequr nga Lubço Georgievski.

Akademia e Shkencave dhe Arteve të Maqedonisë me disa nga botimet e saj ka shtrembëruar faktet historike rreth shqiptarëve, madje edhe me formulime fyese. Në këtë akademi janë të përfaqësuar edhe tre shqiptarë./koha/