Zgjedhjet,BE porosit Kosovën:Shqipëria model i keq

Të dielën e 12 dhjetorit sytë e bashkësisë ndërkombëtare do të jënë në zgjedhjet parlamentare të Kosovës,duke i parë ato si një test demokracie për shtetin e ri.Delegacioni i Parlamentit Europian që do të vëzhgojë këto zgjedhje kryesohet nga Ulrike Lunacek dhe Doris Pack.Eurodeputetët kanë bërë thirrje për pjesëmarrje masive në këto zgjedhje.Vetëm kështu dëshmohet gadishmëria e kosovarëve për të marrë në duar të ardhmen e tyre.
Gjatë një konference për shtyp eurodeputetët kanë tërhequr vëmendjen e partive politike në Kosovë,që të mos veprojnë si partitë në Shqipëri,të mos bëjnë të njëjtat gabime.“Besojnë se ata nuk do të kenë guxim të bëjnë çfarë bëhet në Shqipëri sepse e shohin se çfarë pasojash ka Shqipëria nga kjo. Nëse zgjedhjet do të jenë të rregullta, nëse KQZ dhe ne vëzhguesit e konfirmojme se ato kanë qenë të rregullta, atëherë askush nuk guxon të mos e pranojë rezultatin” tha Doris Pack
Eurodeputetja ishte optimiste se nuk pret të shikojë të njëjtën situatë edhe në Kosovë si ajo që prodhoi Shqipëria.Edhe raportuesja për Kosovën në PE,Ulrike Lunacek i kërkoi partive politike të heqin dorë nga manipulimet e zgjedhjeve dhe përdorimit të mediave për manipulimin e qytetarëve.
Parlamenti Europian do të ketë një delegacion vëzhguesish prej 7 vetash në Kosovë.Vëzhguesit e OSBE-OHDIR do të mungojnë duke qenë se Kosova nuk është anëtare e OKB-së.Zgjedhjet parlamentare në Kosovë vijnë pas dorëheqjes së presidentit Fatmir Sejdiu dhe prishjes së koalicionit qeveritar mes PDK-së dhe LDK-së.