Gjirokastër, kapen 70 kg mariuhanë, arrestohet 23-vjeçari

Policia e Gjirokastrës ka bërë të mundur sekuestrimin e 70 kg mariuanë dhe arrestimin e poseduesit të saj. Burime nga policia e Gjirokastrës bëjnë me dije se rreth orës 01.30 të mëngjesit të sotëm shërbimet e Policisë Kufitare të Drejtorisë Rajonale për Kufirin dhe Migracionin Gjirokastër, gjatë shërbimit në kufirin e Gjelbër, kanë konstatuar me anën e mjeteve logjistike tre shtetas të cilët kishin nga një çantë të madhe shpine, ku dyshohej se brenda tyre kishte lëndë narkotike dhe po ecnin drejt vijës kufitare me shtetin grek në vendin e quajtur "Gryka e Bogazit", afër piramidës 24 të kufirit.
Menjëherë forcat e Policisë Kufitare janë vënë në ndjekje të këtyre shtetasëve duke arritur të kapë në flagrancë njërin prej transportuesve i cili është Adil Peshku 23 vjeç, lindur dhe banues në Kostenjë të rrethit Librazhd.
Ndërsa dy personat e tjerë duke përfituar nga errësira dhe moti i keq me shi e dëborë, të favorizuar edhe nga terreni i thyer dhe bimësia kanë arritur të largohen pa u identifikuar nga patrulla e policisë kufitare duke braktisur edhe çantat të cilat janë sekuestruar nga ana e Policisë.
Nga kqyrja që iu bë çantave rezultoi se në tre çantat kishte 60 pako me peshë të ndryshme, të mbështjella me letër natriban ku brenda tyre ndodhej lëndë narkotike e dyshuar si Mariuanë, gjithsej rreth 70 kilogramë. Lënda narkotike u sekuestrua në cilësinë e provës materiale.
Në ndihmë të Shërbimeve të Policisë Kufitare kanë shkuar edhe Specialistët e Sektorit Kundër Narkotikëve në Drejtorinë e Policisë së Qarkut Gjirokastër të cilët po vijojnë operacionin për kapjen e tyre.
Nga informacionet e grumbulluara në rrugë operative si dhe nga hetimet paraprake të kryera nga Specialistët e Sektorit Kundër Narkotikëve në Drejtorinë e Policisë së Qarkut Gjirokastër ka rezultuar se dy shtetasit e tjerë që transportonin lëndën narkotike janë dy të rinj nga Saranda, ku për arsye hetimi nuk bëjmë me dije gjeneralitetet e tyre.