Rritet numri i vjedhjeve të identitetit në internet

nga **WebMaster** Thu 13 Jan 2011 - 8:59

Zyrtarët federalë amerikanë pohojnë se vjedhja e identitetit është një prej llojeve të krimeve që rritet më së shpejti në këtë vend, dhe se kjo gjë mund t’i ndodhë cdokujt që nuk është mbrojtur mirë dhe nuk është i vetëdijshëm për këtë rrezik.
Sipas prognozave statistikore, vjedhja e identitetit do t’i ndodhë çdo të dhjetit amerikan gjatë këtij viti.

Sipas agjencisë së hulumtimeve Javelin Strategy & Research, 39 për qind e të gjitha mashtrimeve të vitit të kaluar janë realizuar falë llogarive të vjedhura në shërbime të ndryshme të internetit, (këto vjedhje identiteti kanë të bëjnë edhe me ato offline). Vetëm para një viti kjo përqindja ka qenë 33 për qind.

Janë të shpeshta rastet kur viktima jeton në një shtet, e krimineli, i cili blen (vjedh) me anë të internetit, në një vend tjetër. Për t’u mbrojtur, rekomandohet mbikëqyrja e transaksioneve bankare, veçanërisht kartelave të kreditit dhe internetit, por edhe atyre llogarive të hapura në emrin tuaj në shërbime të ndryshme. E për t’u bërë viktimë e këtij lloji të krimi, nuk duhet shumë, vetëm t’i lini të dhënat mbi kartelën tuaj bankare në internet. /Telegrafi/