Trafikimi i objekteve kulturore, Apolonia dhe Butrinti me të rrezikuarit

Tiranë- Lufta kundër trafikut të paligjshëm të pronës kulturore, mbetet një sfidë e institucioneve lokale dhe atyre ndërkombëtare. Objektet e trashëgimisë kultutore në Shqipëri kanë qenë përherë preh e këtij trafiku dhe ndër vite një numër i konsiderueshëm objektesh janë zhdukur nga fondet tona. Vetëm një numër i vogël i tyre kanë mundur që në bashkërendim me Interpolin të kthehen në muzetë shqiptare.

Pikërisht për të luftuar këtë fenomen, në Tiranë është mbajtur një aktivitet gjithpërfshirës me në qendër strategji për informim, komunikim dhe rritje të ndërgjegjësimit të opinionit publik përkundrejt këtij fenomeni. Por cilat prej siteve arkeologjike në Shqipëri janë më të ekspozuara ndaj trafikimit. Anthony Krause, drejtues i sektorit të kulturës në zyrën e Venecias të UNESCO-s ka një përgjigje të qartë për këtë. Anthony Krause ka theksuar: “Sitet arkeologjike të Apolonisë dhe Butrintit mbeten më të rrezikuarit në Shqipëri. Janë parqe të hapura ku kryhen gërmime vazhdimisht dhe duhet të bëhet shumë kujdes që të mos zhduken shumë prej objekteve të rralla që gjenden aty”.

Në vendin tonë ekziston kuadri ligjor për mbrojtjen e objekteve kulturore, megjithatë zbatimi i tij mbetet një sfidë tepër e madhe. Edhe Shqipëria, si pjesa më e madhe e vendeve të Evropës Verilindore prej vitesh është e angazhuar në luftën kundër këtij fenomeni. Olsi Lafe, drejtor i trashqgimisë kulturore në Ministrinë e Kulturës, organizatore e këtij seminari me Zyren e UNESCO-s në Venecia tregon se shumë është bërë, por ende ka ngërçe në këtë drejtim.

Për të luftuar këtë fenomen, UNESCO ka realizuar një video e përkthyer në të gjitha gjuhët e Evropës Juglindore, përfshirë edhe gjuhën shqipe me synimin për të rritur ndërgjegjësimin e publikut për luftën kundër trafikimit të paligjshëm të objekteve kulturore.(gazetaidea.com)