Paja prish martesën 11-11-11 të Bangladeshit

nga Emona Wed 23 Nov 2011 - 5:18

Shaëkat Khan nga Bangladeshi, i cili e kishte organizuar martesën e tij pikërisht në orën aspiruese 11:11 në ditën e 11 nëntorit të vitit 2011, shpresonte në një jetë të gjatë dhe të lumtur me bashkëshorten e tij. Por shpresat e tij u shuan kur ajo e braktisi, vetëm disa minuta pas ceremonisë.

Khan tha se nuk e di se pse nusja e tij e re kishte ikur, por Farzana Yasmin thotë se ishte zemëruar fort nga kërkesa e familjes së tij për pajë, në të cilën duhej të përfshihej një frigorifer dhe një televizor.

“Për ta bërë ngjarjen sa më speciale, unë madje shtypa edhe ftesa të shtrenjta, ftova miq dhe të afërm për të marrë pjesë në dasëm”, tha Khan (32), duke e shpjeguar ngjarjen që ishte kurdisur të zhvillohej në 11:11 më 11-11-11.

“Martesa u bë në një xhami, pikërisht në kohë”, tha Khan, një mësimdhënës, duke shtuar se besonte që 11-shi do të ishte numri i tij i fatit. “Kishim planifikuar edhe një aheng pas dasme, dy ditë më vonë. E kisha pritur këtë ngjarje numerike për vite me radhë. Nuk e dija se do të përfundonte në mënyrë kaq skandaloze”.

Yasmin (27) ishte përshëndetur nga shumë bangladeshas për vendimin e marrë kundër pajës, një zakon ky i paligjshëm dhe shumë i kritikuar, në të cilin familja e nuses duhet t’i japë dhurata të shtrenjta bashkëshortit të saj.

“E braktisa, pasi nuk dua të përfundoj si mijëra viktima bangladeshase të pajës”, tha Yasmin, e cila u shndërrua në një sensacion medial në Bangladesh.

Shefi i policisë lokale, Babul Akhter, i mbështeti pretendimet e saj, duke thënë se martesa e së premtes së kaluar në Patuakhali u prish për shkak të kërkesave për pajë të bëra nga tezja e dhëndrit, gjatë ceremonisë së martesës.

“Nusja e pyeti dhëndrin nëse mbështet dhuratën ilegale. Ai tha se e përkrah, duke e nxitur vajzën që ta braktisë atë”, tha Akhter. Khan mohon pretendimet, duke thënë se është mjaft i pasur për të pasur nevojë për pajë. Gzidea.com