Rusi, fiton zyrtarisht partia e Putin, priten protesta

MOSKË- Gazeta zyrtare ruse publikoi sot rezultatet zyrtare të zgjedhjeve parlamentare të 4 dhjetorit, duke konfirmuar fitoren e partisë në pushtet Rusia e Bashkuar me 49,32 për qind të votave, ndërkohë që opozita po bëhet gati të mbledhë mijëra manifestues për të denoncuar manipulimet.

Sipas këtyre rezultateve të publikuara nga "Rossiïskaïa Gazeta", që prakikisht nuk ndryshojnë nga rezultatet paraprake të publikuara të hënën, partia e kryeministrit Vladimir Putin ka një mazhorancë absolute me 238 mandate ndër 450 në Duma, Dhoma e Ulët e parlamentit.

Rezultatet i japin 92 vende Partisë Komuniste që mori 19,19 për qind të votave, 64 partisë Rusia e Drejtë, e qendrës së majtë me 13,24 për qind dhe 56 Partisë Liberaldemokrate, nacionalste me 11,67 për qind.

Mijëra persona po bëhen gati të manifestojnë sot në të gjithë Rusinë me thirrjen e opozitës për të denoncuar rezultatet e këtyre zgjedhjeve, ndërkohë që vendi është përfshirë që nga fillimi i javës nga një mobilizim i paprecedentë prej vitesh, që po shtypet nga forcat e rendit.

Rreth 20 000 persona marrin pjesë sot në një manifestim kundër rezultateve të zgjedhjeve parlamentare të 4 dhjetorit të fituara nga partia e Vladimir Putinit, njoftoi policia e Moskës. Sipas një burimi policor të cituar nga agjencia zyrtare e lajmeve Itar-Tass, numri i manifestuesve arriti në afro 20 000 pak përpara orës 15:00 lokale (11:00 GMT).

Njëri nga liderët e lëvizjes së opozitës Solidarnost, Ilia Ponomarev, i cituar nga Interfax, u shpreh se rreth 40 000 persona ndodhen tashmë në sheshin Bolotnaïa në qendër të Moskës dhe se 10 000 persona janë ende duke ardhur. Mobilizimi për denoncimin e zgjedhjeve të 4 dhjetorit, me manifestime në shumë qytete të vendit, është i paprecedentë në Rusi që prej ardhjes në pushtet të Vladimir Putinit në vitin 2000.

(ma.ar/BalkanWeb)

qenka katandisur me keq se vendi yne.