Vrasja në autobus, nëna e autorit: Për atë që vrau djali im, kanë të drejtë të hakmerren

TIRANE -
Mort në shtëpinë e autorit të krimit. Pavarësisht se është djali i tyre
36-vjeçar që vrau pasditen e së dielës 18-vjeçarin Napolon Mustafa,
familja Ajazi ka vendosur të mbajë zi.

Dje ata hapën dyert e
hekurta të vilës dykatëshe në Bathore, duke pritur e përcjellë vizitorë
për ngushëllime në shenjë solidariteti për dhimbjen e familjes Mustafa.
Një gjest i padëgjuar më parë, por që Sofie Ajazi, nëna e Mirush Ajazit,
autorit të krimit, e ka një arsye pse e ka marrë këtë iniciativë të
pazakontë.

“E ndjeva me shpirt pa hapa dyert e mortit. E ndjeva
sikur të më kishte vdekur im bir. Edhe ai që vrau djali im është djali i
një nëne. I kërkoj falje asaj. Disa herë sot doja që të ikja nga
shtëpia, të shkoja ta takoja atë nënë, ta vajtonim të dyja djalin e
saj.”- shprehet zonja Ajazi.

NGJARJA Shijet
muzikore i kushtuan jetën të dielën një 18-vjeçari, i cili është
goditur për vdekje katër herë me thikë në stacion nga shoferi i
autobusit të linjës Kamzë-Tiranë. Ngjarja e rëndë ndodhi mbrëmjen e së
dielës, rreth orës 19:20, në urbanin e linjës së Kamzës në kryeqytet.

Vrasja,
sipas Policisë, ka ndodhur në stacionin që ndodhet përballë
Universitetit Bujqësor. Pas një debati mes viktimës Napolon Mustafa, 18
vjeç dhe shoferit të autobusit, Mirush Ajazi, 36 vjeç, ky i fundit ka
ndaluar mjetin dhe ka vrarë të riun. Autori i krimit është arrestuar në
flagrancë menjëherë pas ngjarjes.

(er.nu/panorama/BalkanWeb)