BE: Shqipëria të zgjidhë krizën, rrezikon statusin

Ministrat e Jashtëm të Bashkimit Evropian apelojnë që situata politike në Shqipëri të ndryshojë përpara se komisioni të shprehet mbi statusin e vendit kandidat. Pas takimit të në Bruksel, ata kanë pranuar t’iu përgjigjen mediave.
Ministri i Jashtëm suedez, Carl Bildt, u shpreh se, "kjo është një çështje e brendshme e Shqipërisë, por i kërkojmë opozitës të kthehet ne Kuvend dhe për këtë të ketë dialog për çështjet e veçanta", duke shtuar se "shpresoj që situata aktuale duhet të zgjidhet shumë më përpara opinionit të komisionit për Shqipërinë".
Ndërsa kryediplomati slloven Samuel Zbogar tha se "para se gjithash, të gjithë ne shpresojmë që situata politike në Shqipëri të kthehet në vendin e duhur, që opozita të hyjë në parlament".
Sipas tij, presidenti po drejton bisedimet për gjetjen e një zgjidhjeje dhe shpresojmë që ai ta gjejë zgjidhjen sepse kjo do të ishte në të mirë të vetë Shqipërisë në radhë të parë, përsa i takon statusit kandidat.
"Ne shpresojmë që të punojmë së shpejti mbi këtë aplikim në Këshillin e Ministrave të Jashtëm. Shqipëria tani po përgatitet ndaj pyetësorit. Pas kësaj çështja i kthehet Komisionit i cili merr ca kohe për përgatitjen e opinionit. Gjatë kësaj kohe të gjitha problemet në Shqipëri shpresoj të jenë zgjidhur", u shpreh ministri i Jashtëm slloven Samuel Zbogar në qëndrimin e tij për problemin politik shqiptar.
Ministri portugez për çështje evropiane, Pedro Lourtie theksoi: "Stabiliteti politik është i rëndësishëm dhe po ashtu dhe konsolidimi i institucioneve demokratike. Ekziston një proces i cili duhet ndjekur e kritere që duhen përmbushur, ndaj negociatat do të ndiqen deri në fund". /