Haradinaj heq dorë nga LDK-ja

nga Li12i-GG ARMY Thu 25 Feb 2010 - 0:11

Prishtinë, 25 shkurt – Ramush Haradinaj thotë se ka hequr dorë nga synimi i tij për bashkim forcash të AAK-së me Lidhjen Demokratike të Kosovës.
Qëndrimi i Haradinajt është shprehur pas refuzimit të ofertës për koalicion parazgjedhor dhe zgjedhje të parakohshme nga ana e kryetarit të Lidhjes Demokratike të Kosovës, njëherësh kryetar i vendit, Fatmir Sejdiu.
“Rrugët e Aleancës për Ardhmërinë e Kosovës dhe Lidhjes Demokratik të Kosovës janë ndarë”, ka thënë Haradinaj, të mërkurën, në një konferencë shtypi, pas nënshkrimit të memorandumit për bashkëpunim me Lëvizjen Nacionaldemokratike Shqiptare.
Pas nënshkrimit të kësaj marrëveshjeJE me kryetarin e NDSH-së, Pashk StakA, Haradinaj ka komentuar edhe për takimin e ditës së martë me presidentin Sejdiu.
Sipas Haradinajt, presidenti Sejdiu ka vlerësuar në takimin e së martës se mbajtja e zgjedhjeve duhet të ndodhë në afatin ligjor më 2011.
“Presidenti vlerëson vazhdimin e mandatit të institucioneve të sotme të koalicionit qeverisës, është edhe bindja e tyre e presidentit dhe e kolegëve të tij. Bazuar në ketë, realisht, po ndahen rrugët, po ndahet rruga e Aleancës”, ka thënë ai.
Haradinaj ka shtuar se partia e tij do t’i kthehen pozicionit të tyre opozitar, duke mos përjashtuar nga kritikat as LDK-në.
“Ne do të jemi të obliguar në ushtrimin e funksioneve tona, të ballafaqohemi me qeverisjen, me koalicionin qeverisës, me partitë në koalicion qeverisës, t’i ballafaqojmë këto dy parti me dëmet që po i shkaktojnë vendit, duke e ruajtur gjendjen e tashme”, ka theksuar ai. “Sikurse e dini oferta jonë për bashkëpunim ka pasur tri momente, ai i parI është ndërprerja e koalicionin PDK-LDK, i dyti shpallja e zgjedhjeve të parakohshme dhe i treti fillimi i gjendjes së re. Presidenti në emër të LDK-së, vlerëson ta vazhdojë gjendjen e tashme që për ne është e papranueshme dhe vetvetiu rrugët tona ndahen. Nga dita e djeshme partneriteti ynë dhe shumë aktivitete të tjera ndahen”, ka thënë Haradinaj. Ndërsa sa i përket mundësisë së bashkëpunimit me LDK-në, në zgjedhjet e ardhshme që parashihen të mbahen në vitin 2011, Haradinaj ka thënë që nëse këto zgjedhje vërtet do të mbahen në kohën e paraparë, atëherë AAK-ja, gjatë kësaj kohe do të vlerësojë së çfarë ka ndodhur, cili ka qenë roli ose funksioni i secilit në politikën kosovare.
“Do të bashkëpunojmë aq sa mendojmë se nuk i është bërë dëm vendit”, ka thënë Haradinaj.
Të mërkurën kryetari i Aleancës për Ardhmërinë e Kosovës, Ramush Haradinaj, dhe Pashk Staka, kryetar i Lëvizjes Nacionaldemokratike Shqiptare, kanë nënshkruar memorandum bashkëpunimi për “unifikimin e spektrit të djathtë në Kosovë”, siç janë shprehur ata.
Haradinaj, ofertën e tij për bashkëpunim me LDK-në e kishte bërë qysh në janar të këtij viti, përmes një letre drejtuar kryetarit të Lidhjes Demokratike të Kosovës dhe njëherësh kryetar i Kosovës, Fatmir Sejdiu. Me këtë letër ai e ftonte LDK-në që të garonin së bashku në zgjedhjet e parakohshme që do të mbaheshin në qershor të këtij viti. Kreu i AAK-së nuk ka marrë përgjigje deri të martën, kur presidenti Sejdiu ka pranuar kërkesën e Haradinajt për takim në Presidencë. Një ofertë për koalicion, kryetari i LDK-së, Sejdiu, kohë me parë e kishte marrë edhe nga Nexhat Daci, kryetar i Lidhjes Demokratike të Dardanisë, së cilës ende nuk i ka dhënë përgjigje.