PS: Berisha po zvarrit zgjidhjen

Partia Socialiste ka deklaruar se kryeministri Berisha është duke zvarritur zgjidhjen e krizës politike. Sekretarja për Marrëdhëniet me Jashtë e kësaj partie, Arta Dade deklaroi se opozita e ka bërë ofertën e saj, duke iu referuar projektligjit të depozituar në Kuvend.
“Kriza politike është ulur këmbëkryq në Shqipëri, dhe kjo krizë nuk mund dhe nuk do të zgjidhet nëse ka kërkesë të Partisë Socialiste për një hetim të plotë të zgjedhjeve të 28 qershorit. Partia Socialiste e ka ofruar tashmë kompromisin e saj dhe vullnetin e saj konstruktiv, së pari duke njohur rezultatin e zgjedhjeve të dalë nga skema e Ruzhdies, dhe së dyti duke dorëzuar ne parlament nismën ligjore për të gjetur zgjidhjen përfundimtare të kësaj krize”, tha Dade.
Më tej, ajo tha se PS ka vendosmërinë e duhur për t’i qëndruar kauzës, sipas saj, të drejtë dhe për të çuar deri në fund transparencën e zgjedhjeve në mënyrë që, siç tha ajo, skema e Ruzhdies të mos kthehet në mallkimin e zgjedhjeve të lira në Shqipëri.
“Vullneti i Partisë Socialiste për transparencën e plotë të zgjedhjeve dhe hapjen e kutive nuk do të tretet përballë kokëfortësisë së kryeministrit të Ruzhdies. Përkundrazi e vërteta shokuese që po del tashmë mbi kutinë e Ruzhdies që Sali Berisha aq shumë e ka për zemër vetëm sa e shton vendosmërinë tonë për t’i qëndruar kauzës sonë të drejtë. Sali Berisha duhet të kuptojë se Partia Socialiste nuk mund të heqë dorë nga kërkesat e saj, sepse në këtë rast skema e Ruzhdies do të kthehej në mallkimin e zgjedhjeve të lira e të ndershme në këtë vend. Sfida për Sali Berishën është e hapur, nëse ai trembet nga kjo transparencë, atëherë kjo është humbja e tij e madhe”, shtoi Dade./