AAK: Cilësi për qytetarët dhe dinjitet për punëtorët shëndetësorë

AAK ka përcjell me vëmendje grevat e punëtorëve shëndetësorë të Kosovës që kanë pasur për qëllim përmirësimin e gjendjes së tyre materiale, miratimin e ligjit për sigurime shëndetësore dhe të ligjit për punën, si dhe status të posaçëm për QKU.
Siç thuhet në një komunikatë për media, duke i përkrahur në tërësi këto kërkesa, AAK ndjen keqardhje për faktin se për realizimin e tyre punëtorët shëndetësorë është dashur të dalin në rrugë dhe të shtrojnë ultimatume.
“Rruga dhe ultimatumi, si mënyra të komunikimit, fatkeqësisht, vetëm kanë vërtetuar konstatimet e AAK-së, se kjo qeveri nuk ka zgjidhje për problemet e shëndetësisë dhe sidomos jo për sa i përket qëndrueshmërisë së saj financiare. Por, edhe më tepër, se nuk ka vesh për t’i dëgjuar këto”, theksohet në komunikatë.
Ndryshe nga Qeveria, siç thuhet më tej, AAK ka një program të qartë të financimit të shëndetësisë të bazuar në katër shtylla: themelimin e fondit të sigurimeve shëndetësore, tërheqjen e kapitalit privat, racionalizimin e shpenzimeve dhe donacionet ndërkombëtare.
Natyrisht, të gjitha këto ndryshime - sipas AAK-së, mund të ndodhin vetëm nëse sistemi shëndetësor riorganizohet. “Kjo nënkupton pozita dhe role të tjera për të gjitha nivelet e shërbimeve shëndetësore. Jo reforma, sepse ky sistem është i pareformueshëm, por ndryshime rrënjësore, zëvendësim me një sistem të ri, të ngjashëm me atë të vendeve evropiane drejt të cilave jemi nisur”, thekson kjo parti.