Berisha: Kutite i hap vetem prokuroria

Kryeministri Sali Berisha ritheksoi dje ne menyre te qarte se mazhoranca nuk ka ndermend te plotesoje kerkesen e opozites per hapjen e kutive te votimit ne nje komision parlamentar.

Ky qendrim u mbajt nga kreu i qeverise gjate nje takimi qe zhvilloi pasditen e djeshme me te derguarin special te kryetarit ne detyre te OSBE-se, Konstantin Zhigalov, dhe delegacionin qe e shoqeronte.

Kryeministri theksoi se mazhoranca i propozonte opozites qe ne lidhje me kerkesen e saj per hapjen e kutive te votimit, duhej t’i drejtohej prokurorise mbi bazen e provave qe ajo mund te kishte per zona te caktuara.

Po keshtu, ne njoftimin e zyres se shtypit te Kryeministrit, ne lidhje me kete takim theksohet se Berisha ka deklaruar se mazhoranca eshte e hapur per shqyrtim bilateral te te gjitha çeshtjeve te tjera qe kerkon nga opozita.

“Jemi te gatshem te bejme shqyrtim bilateral te çdo çeshtjeje, me perjashtim te atyre qe kane te bejne me gjyqesorin, si dhe pranimin e te gjitha amendamenteve te propozuara nga opozita, sipas rekomandimeve te OSBE/ODIHR dhe KiE, duke respektuar parimet kushtetuese dhe standardet nderkombetare”, citon zyra e shtypit Kryeministrin Berisha gjate takimit me delegacionin e OSBE-se.