Athina: Gati të zbatojmë marrëveshjen për varret e ushtarëve grekë

TIRANE – Ministria e jashtme e Greqisë ka bërë me dije dje në një deklaratë se përshëndet vendimin e Parlamentit të Shqipërisë për ratifikimin e marrëveshjes mes dy vendeve e cila parashikon ngritjen e dy varrezave për ushtarët grekë të vrarë në Shqipëri gjatë luftës italo-greke.
Zëvendësministri Dimitris Droutsas e ka bërë të ditur qëndrimin se Greqia është e kënaqur me këtë marrëveshje, gjatë një komunikimi telefonik me ministrin e Jashtëm të Shqipërisë, Ilir Meta.
Zv.ministri grek mësohet se ka përcjellë vlerësimin e palës greke për “një çështje humanitare dhe me rëndësi historike për popullin grek”, siç është shprehur Droutsas, numri dy i diplomacisë greke.
Në deklaratën e Ministrisë së Jashtme në Athinë, duhet se pala greke është e përgatitur për zbatimin e menjëhershëm të marrëveshjes në bashkëpunim me palën shqiptare.
“Kjo çështje me natyrë humanitare dhe me rëndësi historike për popullin grek duhet të gjejë zgjidhje, si një mënyrë për të paguar kontributin e duhur atyre që luftuan heroikisht për Atdheun”, vijon më tej deklarata e Ministrisë së Jashtme në Athinë.
Marrëveshja mes dy vendeve u votua tri ditë më parë në Parlamentin e Shqipërisë ku mori 66 vota duke humbur mbështetjen edhe të disa deputetëve Brenda maxhorancës