Pensionet, të keqpërdorura politikisht

Artur Lamaj, një ekspert që vitet e fundit ka mbikëqyrur reformat e pensioneve në shumë vende të rajonit për llogari të Komisionit Europian thotë se skema shqiptare e pensioneve është në tranzicion të thellë dhe ka nevojë për një reformë urgjente.

Lamaj thotë se për këtë nevojitet paraprakisht një konsesus i gjerë politik.Sipas tij, skema aktuale e pensioneve është e paqëndrueshme sepse në vite është menaxhuar politikisht dhe jo mbi bazën e kritereve ekonomike

“Ka pasur rritje të pensioneve dhe ulje të kontributeve të pakontrolluara. Parimi është që rritja duhet të jetë në atë pikë sa në fond të teprojë dicka nga rritja ekonomike. Ndërsa ne jo vetëm e kemi harxhuar këtë, por kemi paguar edhe më shumë”, u shpreh Lamaj.

Lamaj paralajmëron se nëse Shqipëria do e zvarrisë edhe më reformën e pensioneve, skema do të vazhdojë të marrë para nga buxheti derisa deficiti të dalë nga kontrolli dhe të bëhet i papërballueshëm.

“Sa kohë të vazhdojë kjo situatë aq më shumë skema do vazhdojë të marrë para nga buxheti dhe aq do thellohet deficiti”, theksoi Lamaj.

Në vitin 2009 deficiti i skemës së sigurimeve arriti në rreth 55 milionë dollarë, gati dhjetë herë më shumë se një vit më parë. Ky eshte deficiti me i larte i pese viteve te fundit.