Doganat, rritje zero edhe në shkurt

Të ardhurat nga doganat të qeverisë shqiptare gjatë muajve janar e shkurt të këtij viti, qenë në të njëjtin nivel me vitin e kaluar, pavarësisht rritjes së taksave të akcizës, mbajtjes së referencave doganore artificialisht të larta dhe zhvlerësimit të lekut.


Lajmi bëhet i ditur nga statistikat doganore të publikuara dje.

Të ardhurat për periudhën dymujore qenë 15.1 miliardë lekë, (110 milionë euro), po aq sa patën qenë një vit më parë.

Qeveria pati programuar të mbledhë 10 për qind më shumë se një vit më parë, por kriza ekonomike ka sjellë rënien e ndjeshme të importeve të disa mallrave të rëndësishëm, gjë që ka shkaktuar edhe një deficit prej rreth 13 milionë eurosh.

Nëse vijon e njëjta situatë deri në fund të vitit, financat publike në Shqipëri mund të vuajnë probleme të rënda likuiditeti, ndërsa borxhi publik pritet të rritet më tej.

Në të njëjtën kohë është rritur edhe sasia e taksave që shqiptarët kanë paguar për mallrat e importuara. Kështu, gjatë dy muajve të parë të këtij viti, qeveria ka arkëtuar 34 lekë për çdo euro mall të importuar, ndërkohë që në vitin 2009 pati arkëtuar vetëm 31 lekë.