Përpjekjet anti-drogë të vazhdojnë

Përpjekjet anti-drogë të vazhdojnë

Raporti i Departamentit të Shtetit mbi Trafikun Ndërkombëtar të Drogës thotë se Shqipëria dhe Kosova shërbejnë si vende transite të trafikut të drogës që vjen nga Afganistani për në Evropën Perëndimore.
Ish- shef i operacioneve në Agjencinë Amerikane kundër Trafikut të Drogës dhe ekspert i anti-trafikimit, Michael Broun, thotë se megjithëse vendet e Ballkanit kanë rritur numrin e konfiskimeve, grupet e krimit të organizuar përsëri arrijnë të gjejnë rrugë të tjera. Broun thotë se kjo ndodh jo vetëm nga shkathtësia dhe fuqia e këtyre grupeve, por edhe për shkak të mjeteve të kufizuara në dispozicion të forcave të rendit, ushtrisë dhe shërbimeve të zbulimit që e luftojnë këtë trafik në vendet e Ballkanit.
I pyetur për efikasitetin e qeverive të Shqipërisë dhe Kosovës në operacionet e tyre kundër trafikut të lëndëve narkotike, Broun është shprehur se mendon se ato po bëjnë një punë të mirë, por përpjekjet duhet të vazhdojnë gjithmonë.
“Duke marrë parasysh mjetet që kanë në dispozicion, ato po punojnë mirë. Policia, ushtria dhe institucionet e sigurisë mund të veprojnë deri në një farë mase. Unë sapo e thashë se këto grupe të fuqishme që trafikojnë sasi të mëdha droge janë shumë elastike dhe të shkathëta. Dhe për sa kohë që policia, ushtria dhe shërbimet e zbulimit nuk kanë mjetet ajrore, detare apo tokësore për ta dërguar policinë në vendin e duhur në kohën e duhur, atëherë ata do të hasin në vështirësi”, është shprehur Broun për Zërin e Amerikës.