Kriza, PE përfaqësues në Shqipëri

Pas tentativave të Këshillit të Europës, Parlamenti Europian po shqyrton mundësinë për të dërguar një përfaqësi të forcave të ndryshme politike në Tiranë, për të zgjidhur mosmarrëveshjet mes demokratëve dhe socialistëve.


Numri 2 i grupimit të majtë në Parlamentin Europian Hannes Swoboda ka shtruar këtë propozim në tryezën me përfaqësuesin e qeverisë Lulëzim Basha.

“Gjatë takimit, kur po diskutonim situatën politike në Shqipëri, z. Swoboda, i tha ministrit tuaj të Brendshëm se Parlamenti Europian, në fakt jo kështu për të qenë të saktë, por që socialistët dhe disa grupe të tjera në Parlamentin Europian, ishin të gatshëm të vinin në Shqipëri në mënyrë që të ndihmojnë për të zgjidhur situatën politike. Mendoj se është një sugjerim sensibël dhe ofertë e brishtë”, është shprehur Eduard Kukan, kryetar i delegacionit të PE-së për Ballkanin.

“Disa prej kolegeve tanë, përfshi dhe unë apo të tjerë, mund të vimë në Shqipëri e të diskutojme me palët për të gjetur zgjidhje. Të mundohemi të gjejmë arsyet pse opozita mbetet ende e pakënaqur e t’i japim edhe qeverisë shansin për të bërë disa hapa përpara për të dhënë me të vërtet një mundësi sesi mund të shikohet ndershmëria, hapja dhe sinqeriteti në këto zgjedhje”, theksoi zëvendëspresidenti i PSDE-së, Hannes Swoboda.

“Kur Partitë Popullore Europiane mbështesin qeverinë e socialistët europianë mbështesin qartësisht Partinë Socialiste të Edi Ramës, unë mendoj se kjo nuk është rruga për t’ju ndihmuar, mendoj se duhet të bashkojmë forcat në Parlamentin Europian për t’i bërë presion politikanëve shqiptarë”, tha Kukan.

“Mund të kërkojmë ekspertizë nga Komisioni i Venecias, mund të shohim më konkretisht këtë çështje, sepse duke argumentuar vetëm politikisht mbetet e pamjaftueshme, duhet të shkojmë më thellë për të parë këto shqetësime, nëse ato justifikohen sipas përcaktimit kushtetues”, deklaroi Swoboda.

Ministri i Brendshëm Lulëzim Basha zhvilloi me dyer të mbyllura një seancë pyetje-përgjigjesh me eurodeputetët ku ka shpjeguar përparimet e vendit në përputhje me udhërrëfyesin e komisionit për liberalizimin e vizave.